Gwarantau ceir

Mae gwarant car yn eich diogelu rhag gorfod talu am gostau llafur ac amnewid rhannau penodol o’ch cerbyd os bydd yn dioddef o ddiffygion mecanyddol neu fethiant trydanol. Yn aml gall trwsio eich cerbyd fod yn gostus.

Mae’n bwysig gwirio sut i gadw eich gwarant yn ddilys. Efallai bod uchafswm milltiroedd, neu efallai y byddwch angen gwasanaeth i’ch car yn ystod ysbeidiau penodol a gallai colli gwasanaeth wneud y warant yn annilys. Felly gwiriwch y warant yn ofalus a gweld yn union beth sydd wedi ei gynnwys.

Os na fydd rhywbeth yn glir, gofynnwch i rywun esbonio.

Yn aml, byddwch angen talu swm tuag at gael amnewid a gosod y rhannau. Dyma’r gormodedd ac fel arfer bydd yn ychydig gannoedd o bunnoedd.

Os byddwch yn prynu car newydd, neu gar ail-law gan werthwr, efallai y bydd y warant yn gynwysedig yn safonol neu efallai y bydd rhaid i chi dalu amdano.

Mae pob gwarant car yn wahanol o ran y rhannau sy’n gynwysedig, gyda gwahanol amodau a thelerau, a gall y costau ar gyfer gwarantau amrywio’n sylweddol hefyd.

Ymysg rhai pethau fydd polisïau fel arfer yn eu cynnwys mae:

• injan a systemau tanwydd
• cydiwr a gerbocs
• sysbension
• breciau
• llyw.

Weithiau gallwch ymestyn y warant fel eich bod wedi’ch sicrhau am flwyddyn neu ddwy arall, neu fel bod y warant yn cynnwys sicrwydd ar gyfer problemau ychwanegol. Bydd angen i chi dalu ychydig yn fwy os ydych eisiau uwchraddio eich gwarant.

Dywedodd adroddiad gan gylchgrawn Which? “Mae’n anodd cyfiawnhau cost hyd yn oed y warant car ail-law rhataf pan fyddwch yn ystyried y nifer di-rif o eithriadau, premiymau drud a chost gyfartalog isel atgyweirio blynyddol.

Byddem yn argymell rhoi arian i’r naill ochr bob blwyddyn i dalu am unrhyw atgyweiriadau, ond os ydych yn awyddus i gael gwarant, ystyriwch dalu amdano pan fyddwch yn prynu eich car. Mae’r gwarantau estynedig hyn gan y gwneuthurwyr yn dueddol o fod â llai o eithriadau na’u cystadleuwyr trydydd parti.”

Daw gwarant y gweithgynhyrchwyr gyda phob car newydd.

Gall y rhain barhau am rhwng tair a saith mlynedd a dylent gynnwys y rhan fwyaf o ddiffygion heblaw traul ar rannau fel teiars a phadiau brêc.

Er mwyn i’r warant fod yn ddilys, bydd rhaid i chi ddilyn rhai rheolau fel arfer. Er enghraifft, sicrhau bod y car yn cael gwasanaeth mewn pryd a gan werthwr ceir ag enw da ganddo.

Pan fydd gwarant y gweithgynhyrchwr yn dod i ben, bydd gennych rai opsiynau:

• cronni cynilion i dalu am gostau annisgwyl – cymrwch olwg ar ein tudalen Cynilion argyfwng am help i gronni cynilion argyfwng
• gwerthwch eich car a phrynu un gyda gwarant
• prynu gwarant newydd - gallwch ddefnyddio safle cymharu i helpu canfod y bargeinion polisi gorau

Mae sicrhau’ch bod yn bodloni rheolau a gofynion eich polisi gwarant yn allweddol i osgoi cael gwrthod hawliadau.

Gellir annilysu hawliadau o ganlyniad i:

• barhau i ddefnyddio eich cerbyd hyd yn oed os bydd golau rhybudd yn ymddangos ar y dangosfwrdd
• gyrru eich cerbyd er bod yna nam mecanyddol neu drydanol amlwg
• peidio â chael gwasanaethu eich cerbyd yn ystod y cyfnodau a argymhellir gan wneuthurwr y cerbyd
• gwneud addasiadau i’r cerbyd, neu osod rhannau ansafonol neu rannau nad ydynt gan y gwneuthurwr yn ystod gwaith atgyweirio
• rhoi’r tanwydd neu hylif anghywir yn eich cerbyd e.e. olew neu oerydd
• peidio â dilyn y weithdrefn hawliad gwarant yn gywir.

Cyn cymryd gwarant car ail-law gofalwch eich bod yn darllen y print mân.

Dyma’r pwyntiau sylfaenol y dylech eu gwirio.

• A oes terfyn i’r swm o arian y gallwch hawlio amdano?
• A oes gormodedd ar y gwarant?
• A yw’r amserlen gwasanaeth yn dderbyniol?
• A oes cyfnod ystyried safonol o 14 diwrnod?
• A yw’n nodi cyfyngiad ar eich milltiroedd blynyddol neu gyfanswm y milltiroedd?
• A allwch hawlio ar ôl cyfnod penodol yn unig, fel mis?
• A yw’r polisi yn cynnwys costau llawn trwsio – nid dim ond y rhannau neu’r gwaith?
• A yw’r cwmni gwarant wedi cofrestru â’r ABI (Cymdeithas Yswirwyr Prydain)?
• A oes uchafswm a fyddai’n cael ei dalu am gostau gwaith, gan adael i chi dalu am unrhyw beth ychwanegol?
• Pa fodurdai sydd ar y rhestr ar gyfer rhoi gwasanaeth a thrwsio, a ble maent a beth yw eu costau?
• Cofiwch, os yw eich car yn nesu at yr uchafswm o ran oedran a ganiateir, efallai nad yw’n werth prynu gwarant.
• Yn aml bydd cytundebau gwarant yn defnyddio terminoleg benodol iawn, felly efallai na fyddwch yn gwybod yn union beth mae termau fel ‘gwellhad’ neu ‘draul gyffredinol’ yn ei olygu. Mae gan Which? restr A-Z i’ch helpu

Nid yw gwarant ddim yn disodli eich hawliau cyfreithiol dan y Ddeddf Hawliau Defnyddwyr 2015. Felly, ynghyd ag unrhyw sicrwydd mae’ch gwarant yn ei gynnig, dan y ddeddf mae gennych yr hawl i wrthod car os yw’n ddiffygiol a chael ad-daliad llawn o fewn 30 niwrnod i’w brynu.

Efallai eich bod hefyd wedi’ch diogelu dan adran 75 y Ddeddf Credyd Defnyddwyr 1974 a’r Ddeddf Hawliau Defnyddwyr 2015. Byddwch wedi’ch diogelu os taloch yn defnyddio cerdyn credyd neu os gwenaethoch brynu’r car gyda hurbwrcas gan werthwr. Mae Adran 75 yn golygu bod y darparwr cerdyn credyd, neu’r darparwr cyllid yn achos hurbwrcas, yn gyfrifol ar y cyd am unrhyw broblemau.

Os ydych yn cael trafferth gyda’r gwasanaeth rydych yn ei dderbyn yn rhan o’ch gwarant, er enghraifft atgyweiriad gwael, mae camau y gallwch eu cymryd.

Yn gyntaf dylech gysylltu gyda’r garej neu werthwr i geisio datrys y mater.

Os na allwch ddod i gytundeb, dylech gysylltu â’r gymdeithas fasnach neu’r garej neu werthwr rydych yn delio â hwy.