Taliad ymlaen llaw o Gredyd Cynhwysol a help arall

Os yw’ch amgylchiadau wedi newid a bod eich taliad nesaf i fod i gynyddu ond nad ydych wedi’i dderbyn eto gallwch ofyn am daliad ymlaen llaw.

Gallwch ofyn am daliad ymlaen llaw trwy eich anogwr gwaith, drwy eich cyfrif ar-lein, neu drwy ffonio Llinell Gymorth Credyd Cynhwysol. Ers dechrau’r argyfwng coronafeirws, mae’r llinellau ffôn wedi bod yn brysur iawn, felly mae’n debyg mai ar-lein yw’r dewis gorau.

Fe ofynnir i chi esbonio pam eich bod angen y taliad ymlaen llaw, i ddarparu eich manylion banc ac i gael gwiriad hunaniaeth.

Dylech gael penderfyniad yr un diwrnod a dylai unrhyw daliad ymlaen llaw y cytunir arno gael ei dalu i’ch banc o fewn tri diwrnod gwaith. Os na allwch aros am dri diwrnod, mae’n bosibl ei gael ar yr un diwrnod.

Gallwch wneud eich ad-daliadau dros uchafswm o gyfnod o 24 mis. Aa gall hyn fod am hyd at 25% o lwfans sylfaenol eich Credyd Cynhwysol.

Os ydych wedi gwneud cais trwy eich cyfrif ar-lein, bydd y symiau am y gwahanol gyfnodau ad-daliadau yn cael eu dangos i chi.

Os ydych wedi gwneud cais trwy eich anogwr gwaith neu ymgynghorydd llinell gymorth, byddant yn egluro faint fydd yn rhaid i chi ei ad-dalu bob mis.

Mae’r ad-daliad cyntaf yn cael ei dynnu o’ch taliad cyntaf.

Efallai y gwrthodir eich taliad ymlaen llaw os ydych chi (neu’r ddau ohonoch os ydych chi’n hawlio fel cwpl):

• heb gael eich hunaniaeth wedi wirio
• gyda digon o arian i barhau tan eich taliad nesaf
• yn byw gyda rhieni, perthnasau neu ffrindiau
• gydag unrhyw enillion terfynol, taliadau diswyddo neu gynilion ar gael.

Gallwch ofyn i’r penderfyniad gael ei ailystyried gan yr Adran Gwaith a Phensiynau (DWP), ond nid oes gennych yr hawl i apelio.

Mae pobl sy’n hawlio Credyd Cynhwysol yn cael eu targedu gan dwyllwyr yn cynnig benthyciadau cost isel neu grantiau gan y llywodraeth.

Efallai bydd rhywun wedi eich ffonio yn honni eu bod yn gweithio i’r Ganolfan Byd Gwaith, neu wedi cysylltu â chi trwy hysbysebion cyfryngau cymdeithasol. Mae gan nifer o’r twyllwyr wefannau sy’n eich argyhoeddi, gyda logos a thystebau gan y llywodraeth.

Efallai y byddant yn gofyn am eich ID a manylion banc, yn cynnig gwneud cais Credyd Cynhwysol a gwneud cais am daliad ymlaen llaw ar eich rhan, gan gymryd rhywfaint o’r arian yma fel eu ffi.

Fodd bynnag, mae angen ad-dalu’r swm llawn o’r taliad ymlaen llaw allan o daliadau Credyd Cynhwysol y dyfodol, felly byddwch yn gorfod talu’r swm cyfan a fenthyciwyd yn ôl.

Mae'n bwysig peidio â chael eich temtio gan y cynigion hyn os ydych chi eisoes yn hawlio unrhyw un o'r budd-daliadau sy'n cael eu disodli gan Gredyd Cynhwysol. Mae'r rhain yn cynnwys credydau treth a Budd-dal Tai. Mae hyn oherwydd y bydd eich hen fudd-daliadau yn dod i ben ac efallai y bydd yr arian a gewch ar Gredyd Cynhwysol yn llai na'r hyn rydych yn ei gael nawr.

Os ydych chi wedi cynnig benthyciad gan y llywodraeth yn unig a gofynnwyd i chi roi eich ID a'ch manylion banc, efallai y bydd y sgamiwr yn ceisio gwneud cais Credyd Cynhwysol heb yn wybod i chi. Peidiwch â rhoi’r manylion hyn - oherwydd efallai na fydd gennych hawl i Gredyd Cynhwysol a gallai hyn gael ei ystyried yn dwyll budd-daliadau.

Os ydych yn disgwyl eich taliad Credyd Cynhwysol cyntaf ac eisiau help i wneud cais am daliad ymlaen llaw, bydd Gwasanaeth Help i Hawlio Cyngor ar Bopeth yn eich helpu i gael y taliad rydych ei angen am ddim.

Os yw coronafeirws wedi effeithio ar eich incwm a’ch bod yn poeni am gadw i fyny â’ch rhent, morgais neu filiau eraill, mae help ar gael.

Efallai y gallech wneud cais am Daliad Tai Dewisol tymor byr gan eich cyngor.

Dewch o hyd i’ch cyngor lleol ar wefan GOV.UK

Darganfyddwch fwy am Daliadau Tai Dewisol ar wefan Turn2Us

Os ydych angen cymorth gyda biliau gwresogi, tanwydd neu fwyd neu os ydych yn wynebu taliad argyfyngus, gallwch weld os gall eich cynllun lles lleol helpu.

Yn Lloegr, rhedir y cynllun hwn gan eich cyngor lleol. Dewch o hyd i’ch cyngor lleol ar wefan GOV.UK

Yn yr Alban, darganfyddwch fwy am Gronfa Les yr Alban 

Yng Nghymru, darganfyddwch fwy am y Gronfa Cymorth Dewisol 

Yng Ngogledd Iwerddon, darganfyddwch fwy am gymorth ariannol ychwanegol ar wefan nidirect

Os ydych angen help gyda chyllidebu personol, holwch yn y Ganolfan Gwaith. Byddant yn gallu dweud wrthych ble mae cymorth wyneb yn wyneb ar gael.

Os ydych yn ei chael hi’n anodd talu dyledion sydd gennych yn barod, gofynnwch am gyngor gan elusen cyngor dyledion ar unwaith.