Pum ffordd i leihau premiwm eichyswiriant car
29 Mawrth 2021
Mae cost yswiriant car yn debygol o godi ym mis Ionawr 2022, felly paratowch am brisiau uchel. O'r flwyddyn newydd, mae'r Awdurdod Ymddygiad Ariannol (FCA) wedi dyfarnu na all cwmnïau yswiriant car roi premiwm uwch i gwsmeriaid presennol nag y byddent yn rhoi i gwsmeriaid newydd. Mae'n debygol serch hynny y bydd hyn yn hytrach yn golygu prisiau uwch yn gyffredinol wrth i yswirwyr geisio adennill eu colledion.
Fodd bynnag, mae yna ffyrdd eraill y gallwch chi dalu llai. Dyma ein pum peth gorau i feddwl amdanynt pan fyddwch chi eisiau yswiriant car.
1. PEIDIWCH â thalu'r bil bob mis
Yn wahanol i filiau eraill lle rydych chi'n cael arbedion am dalu drwy ddebyd uniongyrchol, gall talu'n fisol am yswiriant gostio mwy. Mae talu'r premiwm blynyddol mewn un cyfandaliad yn aml yn rhatach.
Cadwch lygad am bethau ychwanegol efallai na fydd eu hangen arnoch neu y gallech fod wedi eich cynnwys mewn man arall. Er enghraifft, mae rhai cyfrifon banc yn cynnig adferiad chwalu. Efallai y byddai hefyd yn rhatach i brynu rhai o'r ychwanegiadau hyn ar wahân.
2. Osgowch adnewyddu awtomatig
Byddwch yn talu llawer mwy os ydych chi'n gadael i'ch yswiriant car rolio drosodd bob tro.
Pan gewch eich dyfynbris, ffoniwch eich darparwr i weld a allant gynnig gostyngiad neu gyfateb pris yn rhywle arall. Os nad ydych yn gofyn, ni chewch.
3. Siopwch o gwmpas
Po fwyaf o amser ac ymchwil a roddwch i gael dyfynbrisiau, y mwyaf tebygol y byddwch chi o gael bargen well.
Mae hyn yn arbennig o bwysig os ydych chi dros 70 neu dan 25 oed, ac yn y flwyddyn gyntaf o adnewyddu pan all premiymau gynyddu'n sylweddol.
Os oes gennych yr amser, casglwch ddyfynbrisiau o leiaf ddau safle cymharu a defnyddiwch yswirwyr a broceriaid nad ydynt yn ymddangos ar safleoedd cymharu. Cofiwch, nid rhataf sydd orau o reidrwydd.
Gall broceriaid yswiriant hefyd eich helpu i ddod o hyd i'r fargen orau - a'r swm cywir o yswiriant - i chi.
4. Lleihau’r risg
Y lleiaf o risg ydych chi, yr isaf fydd eich premiwm.
Wrth asesu'r tebygolrwydd y bydd eich car yn cael ei ddwyn, bydd yswirwyr modur yn ystyried ffactorau a allai leihau'r risg, felly os gallwch chi roi eich car mewn garej dros nos neu osod ansymudwr cerbyd cymeradwy, dylech dalu llai.
Bydd goryrru yn cynyddu eich premiwm - mae yswirwyr fel arfer yn codi mwy os oes gennych bwyntiau ar eich trwydded.
Os ydych chi'n prynu modur newydd, mae dewis car cyflym yn ffordd hawdd o dalu mwy am eich premiwm yswiriant. Bydd dewis model mwy cyffredin mewn categori yswiriant is yn helpu i gadw'r costau i lawr.
5. Defnyddiwch eich bonws dim-hawlio
Os na fyddwch yn dweud wrth yswiriwr newydd am eich bonws dim-hawlio, yna gallai eich premiwm fod yn uwch o ganlyniad.
Mae'n werth ystyried talu premiwm ychwanegol i amddiffyn eich bonws dim hawlio, os ydych chi'n gymwys am bum mlynedd neu fwy o fonws dim-hawlio